ROXAS CITY – Opisyal na nga ginpasarado ang isa ka FM radio station sa Roxas City nga Radyo Todo FM.
Ini ang ginkompirma ni Mrs. Carmen Andrade, ang city business affairs consultant sang interview sang Bombo Radyo Roxas.
Suno kay Andrade nga kaupod ang mga opisyal sang City Licensing Division, Bureau of Fire Protection (BFP) kag Philippine National Police (PNP), ila nga gin-implementar ang closure order batuk sa nasambit nga radio station.
Ginpahayag ni Andrade nga napaslawan ang pamunuan sang nasambit nga radio station nga makasumiter sang ila nga permit gikan sa National Telecommunications Commission (NTC).
Ginpahayag sini nga sadtong Abril 10, sini nga tuig pa ang nasambit nga closure order apang naghinyo ang pamunuan sang nasambit nga radio station nga hatagan sila sang plaso tubtob sa Mayo 31.
Sa pihak sini napaslawan sa gihapon nga makasumiter sang nasambit nga permit ang amo nga estasyon rason nga gilayon nga ginmandu sang City Licensing Division ang pagpasarado sini.
