Isa ka tumalagsahon nga boxing match ang nasaksihan sang mga fans sa ibabaw sang ring sa Madison Square Garden, New York City.
Bangud sa tunga-tunga sang pagbayluhanay sang sumbag sa isa ka heavyweight fight, nakakas ang wig sang isa sa mga boksingero.
Ini ang natabo sa second round sang hampang ni Jarrell Miller kag ni Kingsley Ibeh.
Sa tunga sang hampang, si Ibeh ang nagpaguwa sang asud-asud nga mga sumbag, kag ang uppercut sini ang nag-igo kay Miller sa iya nga ulo, kag nagtuga sang amat-amat nga pagkakas sang iya nga wig.
Apisar wala makakas sang gilayon ang iya nga wig sa iya anit, nakit-an na sang mga tumalan-aw ang upaw nga ulo sini.
Pagkatapos sang ikaduha nga round, nagdesisyon ang boksingero nga kakson na lang ang iya nga wig kag ihaboy ini sa kadam-an.
Madamu naman ang nagkadlaw bangud sa ginhimo sang boksingero.
Apang apisar sang insidente, nagdaug si Miller paagi sa split decision sa score nga 97-93, 97-93 kag 94-96.
