SAPIAN, CAPIZ – Patay ang isa ka iloy matapos aksidente nga natirohan sang iya bata sa Sitio Hinagdan, Barangay Dapdapan, Sapian, Capiz.
Ginkilala ang biktima nga si alyas Inday, 46-anyos samtang ang ginatudlo nga suspek amo ang bata sini nga si alyas Lando, 27-anyos kag lunsay mga residente sang nasambit nga lugar.
Sa interview sang Bombo Radyo kay PMSG Louie Banate, imbestigador sang Sapian Municipal Police Station, ginpahayag sini nga base sa ila imbestigasyon timprano pa sang hapon nakainom ang suspek kag may dala ini nga shoulder bag nga may sulod nga armas-luthang. Ginsaway ini sang iya iloy nga biktima kag gintuyo nga kuhaon ang amo nga bag nga may sulod nga armas agud taguon para indi makadisgrasya. Apang nag-inagaway ang duha kag nakuha sang suspek ang armas kag aksidente nga napitik ang gatilyo rason nga aksidente nga natirohan ang biktima sa nawala sini nga paa.
Gilayon nga nagpangayo sang bulig ang live in partner sang biktima sa mga kapulisan agud dal-on ini sa ospital kun sa diin una nila nga gintago ang matuod nga natabo kag gin-report sa police nga natuslok sang kawayan ang biktima apang natukiban sang ulihi base sa pahayag sang doktor sa mga otoridad nga naagom sang biktima ang samad bangud sa pagluthang pinaagi sa mga nakit-an nga parts sang 12 gauge shell sa pilas sang biktima kag sang ulihi gindeklarar sang doktor nga patay na.
Gilayon nga ginpadulungan sang kapulisan ang suspek kag gin-aresto, samtang narekober naman ang armas-luthang lima ka kilometros ang kalayuon sa ila puluy-an.
Sa karon, nakahunong na ang suspek sa karsel sang Sapian PNP para sa nagakaigo nga disposisyon.
