PRESIDENT ROXAS, CAPIZ- Ginapahayag nga nadula ang isa ka manugpangisda nga residente sang Barangay Pinamihagan, President Roxas, Capiz, kadungan sang pag-igo sang Bagyo Tino sa probinsya.
Sa interview sang Bombo Radyo kay Mayor Receliste Escolin, iya ginpahayag nga nagapadayon ang rescue operations sang mga otoridad kag mga frontliners agud nga masalbar ang nasambit nga persona.
Suno kay Escolin, ang amo nga manugpangisda ang nagpadulong sa baybayon sang Tinagong Dagat sa ila nga banwa, apang tubtob sa subong wala pa nakabalik.
Pahayag nya, sa kutob sang ila nga masarangan, pangitaon gid nila ang amo nga persona kag ginapangabay niya nga kuntani, yara lang sa maayos nga kahimtangan kag may kabuhi pa ang amo nga manugpangisda.
Samtang, sa pihak nga bahin, natigayon na nga makabalik sa tagsa nila ka mga puluy-an ang tanan nga mga evacuees. Ginsiguro man sang alkalde nga ang kada pamilya nga naapektuhan nagbaton sang food packs, apang, lauman pa ang dugang kag masunod nga distribusyon bangud nga nagpangayo sila sang dugang nga bulig sa Department of Social Welfare and Development (DSWD) kag sa gobyerno probinsyal partikular kag Governor Fredenil Castro. Ginsiling man sini nga magapalab-ot man sang bulig ang talatapan ni 1st District Representative Howard Guinto.
Nahibaluan nga sa nag-viral sini nga laragway nga napost sa official facebook page sang Bombo Radyo Roxas, wala ini ginaluaman sang alkalde nga maglapta kag makaangkon sang nagkalain-lain nga komento. Suno sa iya, bangud sa tuman na kakapoy, nakatulog ini sa tunga sang operasyon. Ginpakigbahin sang alkalde nga umpisa sang Oktubre 31 tubtob nga Nobyembre 4, sa munisipyo na ini sya nagtinir agud nga magpanguna sa opreasyon kag masiguro ang kaluwasan sang tagsa-tagsa.
Nagpasalamat naman ang alkalde sa tanan nga mga pumuluyo sa pagpakita sang kooperasyon sa tion sang kalamidad kag sa tanan nga mga frontliners kag officials bangud nga nalampuwasan ang bagyo nga wala sang dako nga halit nga narekord.
Interviewed by Bombo Francis Biñas
