ROXAS CITY – Nakuhaan sang suspected shabu ang isa ka Person Deprived of Liberty (PDL) sa sulod sang Capiz Rehabilitation Center (CRC) Barangay Lawa-an, Roxas City.
Ginkilala ang nadakpan kay alyas Jeanus, 35-anyos, 9 na ka tuig nga priso kag residente sang Barangay Mahunod-hunod, Cuartero, Capiz.
Suno kay CRC Jail Warden Arjuna Yngcong, nakit-an sang isa man ka priso si alyas Jeanus sang Selda dos nga kaangay naga-repack sang sachet sang ginapatihan shabu kag gilayon sini nga ginpahibalo sa ila guwardya. Ginkumpirmar man ini sang guard kag gindakop ang amo nga priso.
Nakuha sa paghinakop sang amo nga PDL ang tatlo (3) ka sachet sang ginapatihan shabu nga may kabug-aton isa (1) ka gramo kag may standard drug price nga P600.
Palamangkutanon naman suno kay Yngcong kun sa diin naghalin ang iligal nga droga.
Sa karon nagapabilin sa kustodiya sang mga kapulisan ang amo nga priso kag natalana nga ipaidalom sa drug test.
Nagapadayon naman ang imbestigasyon sang mga otoridad agud mahibaluan kun sa diin naghalin ang amo nga droga.
