Nagapanawagan ang isa ka tricycle driver sa gobyerno nga kakson ang oil deregulation law agud makabulig sa pagpahagan-hagan sang padayon nga pagsaka sang presyo sang gatong tuga man sang nga kinagamo sa Middle East.
Sa interview sang Bombo Radyo kay Ian de Pedro, isa ka tricycle driver, iya ginpahayag nga ang pagkakas sang nasambit nga layi ang makahatag sang gahum sa gobyerno agud makontrol ang pagsaka sang presyo sang gatong.
Suno kay de Pedro, nagapabilin sa gihapon ang pletehan bangud nagahulat pa sila sang desisyon gikan sa Roxas City Government kun tugutan ang dugang nga P5 sa plete.
Pahayag pa niya, kun magpadayon ang pagtaas sang presyo sang gatong, posible nga magadamu man ang mga tricycle driver nga temporaryo nga maga-untat sa pagbyahe agud magpangita sang iban nga pangabuhian.
Nagapanawagan man ang natungdan nga pamatian kag hatagan sang aksyon sang gobyerno ang mga sentimyento sang mga kaangay nila nga yara sa transport sector nga naga-agunto sa asud-asud nga pagtaas sang presyo sang gatong.
