AGOSTO 22, 2026 – Isa ka kuntani masadya nga pagselebrar sang kaadlawan ang nangin masubo nga hitabo para sa isa ka 16-anyos nga Grade 10 student sa Panay, Capiz matapos ini nga nalumos sa isa ka suba nga sakop sang Sitio Pangpang, Barangay Agbalo, Panay, Capiz.
Natabo ang insidente alas-6:30 sang gab-i.
Ang biktima amo si alyas “Venz,” residente sang Barangay Magubilan kag isa ka estudyante sang Don Felix Balgos National High School.
Nahibaluan nga nag-try out pa ang biktima kaupod ang iya ang iya coach kag mga team sa volleyball antes ini nagpauli.
Sa pag-abot sang team sang Bombo Radyo sa lugar kag pagpakig-angot sa pila ka mga residente, ginapahayag nga ginhambalan pa ini sang mga residente nga indi magtabok kag maghulat na lang sang iya nga sugat apang nagdesisyon ini nga maglangoy na lang agud kuhaon ang baruto sa pihak nga bahin sang suba.
Samtang nagalangoy ini kag yara na sa tunga-tunga hinali nalang ini nga nagsinggit sang tabang sa mga tawo agud kuntani nga mabuligan siya apang dalayon na lang ini nga naglugdang kag wala na nakabutwa.
Gilayon naman nga nagpangayo sang bulig ang pila ka mga residente sa mga otoridad kag pag-abot sa lugar nagpatigayon ini sang Search ang Retrieval Operation agud nga kuntani maluwas pa ang biktima.
Nagligad ang pila ka mga inoras, minuto nga pag-retrieve sa lawas sang biktima wala gid ini makit-an kag pasado alas 12:00 sang kaagahon temporaryo nga ngab gin-untat ang Search and Retrieval Operation.
AGOSTO 23, 2026 – Ginpadayon ang Search and Rescue Operation sa lawas sang biktima.
Nagahulat kag nagalaum ang pamilya sang biktima nga makit-an nga buhi pa ang ila sini nga himata.
Sa bulig sang pila ka mga katapo sang otoridad kag mga residente natigayon nga mgakit-an ang lawas sang biktima. Pasado alas 9:00 sang aga nakit-an ang lawas sang biktima nga wala na sang kabuhi.
Napuno sang singgitan, pagtalangison sang pamilya sang nakit-an nila nga wala na sang kabuhi ang ila sini nga pinalangga.
Sa pagkig-angot sang Bombo Radyo kay Police Captain Eric B. Deocampo, Officer-in-Charge sang Panay Municipal Police Station, ginpahayag nga wala sang foul play sa nasambit nga insidente bangud may yara sang witness nga nakakita sa pagkalumos sang isa ka estudyante.
Dugang pa ni Deocampo, nagapati man ang pamilya sang biktima nga wala sang foul play bangud desisyon mismo sang bata nga maglangoy pakadto sa pihak nga suba.
Pahayag pa nga possible ginpiking ang biktima rason nga wala ini nakaluwas.
Nagpasalig naman si Deocampo nga padayon ang ila hugot nga pagbantay sa palibot agud malikawan ang pila ka mga insidente.
Sa subong yara na ang bangkay sang biktima sa isa ka purenarya.
