TOLOSA, LEYTE – Ginbuyagyag ni Department of the Interior and Local Government (DILG) Secretary Jonvic Remulla nga may yara sang isa na naman ka planado nga pagpang-atake sa eskwelahan pinaagi sa pagpangbuno ukon pagpangluthang sa Tolosa, Leyte, apang ini ang napunggan.
Suno kay Remulla, alas 8 kagab-i, nagtawag sa iya si Senator Bam Aquino kag naghatag sang tip nga may chatter sa Tacloban nga nagasiling nga may yara sang magaluntad nga mass shooting nga matabo.
Yara si Senator Aquino sa Tacloban sang amo nga tion.
Pahayag ni Remulla, base sa imbestigasyon sang Criminal Investigation and Detection Group (CIDG), nakilala ang suspek nga isa ka 14 anyos, Grade 10 student sang Tolosa National High School.
Naghimo ini sang madamo nga facebook accounts agud magpalapta sang makaalarma nga mensahe sa publiko.
Ginpakig-angotan sang mga otoridad ang ginikanan sang 14 anyos kag natukiban nga may yara sang ini personal kag family issues.
Wala man sang armas ang pamilya sang suspek sandig sa imbestigasyon kag posible nga na-impluwensyahan sang natabo nga shooting incident sa Tacloban City.
Nagpanawagan si Remulla sa publiko nga gilayon magtawag sa 911 sa tion nga may nahibaluan nga pagpamahog ukon posible krimen nga matabo agud marespondehan kag mapunggan ang insidente.
