ROXAS CITY — 
Isa pa ka negosyante sa Roxas City ang nagreklamo sa pulisya matapos nabiktima sang ginaalegar mga katapo sang budol-budol sa Hermano Subdivision, Barangay Punta Tabuc sining siyudad.
Suno sa tagreklamo nga si Manang Nene, may duha ka mga lalaki nga nagpalapit sa iya sari-sari store sang Biyernes sang aga kag nagpakilala nga mga dealer sang frozen meat products.
Ginlaragway niya ang isa ka lalaki nga magamay kag yara sa 30-anyos ang edad, samtang ang isa naman ang mabukod, may peklat sa guya kag yara sa 40-anyos ang edad.
Suno sa tagreklamo, gintanyagan siya sang duha nga magnegosyo sang frozen meat products kag hatagan pa siya sang libre nga freezer, magluwas nga ang ila kumpanya pa suno diri nga Sure Meat nga nakabase sa Tarlac ang magabayad sang iya nga bill.
Nagsugot man ang ginang sa ila nga tanyag kag ginhatagan nila ini sang isa plastic nga frozen meat products kaangay sang hotdog, embutido, tocino kag marinated chicken nga ginbayaran man niya sang P2,120 dala na diri ang iya nga downpayment.
Nagpasalig ang mga suspetsado nga balikan nila siya kag dal-an sang dugang nga meat products pati ang freezer, apang wala na ini nila matuman.
Nagduda pa sang ulihi ang tagreklamo nga ginatunto lamang siya sang mga suspetsado sang wala na ang mga ini nagasabat sang iya nga ginatawagan.
Suno pa sa iya nga nasamad lamang ang mga frozen meat products nga ginbilin sang mga suspetsado sa iya, apang tubtob sa karun, wala sa gihapon makaabot ang freezer nga ila ginpasalig sa iya.
Mahibaluan nga isa man ka negosyante sa Barangay 9 ang nagreklamo sa Roxas City PNP nga nabiktima sang mga suspetsado nga may kasubong man nga modus.
