Isa pa ka high-ranking official sang Overseas Workers Welfare Administration (OWWA) ang gin-dismiss bangud sa ginaalegar may kaangtanan sa P1.4-billion land acquisition deal nga kabangdanan sang dalayon nga pagkakas kay anay Administrator Arnell Ignacio.
Suno kay Secretary Hans Leo Cacdac sang Department of Migrant Workers (DMW), ginpahayag nga ginaimbestigaran naman si anay Deputy Administrator Emma Sinclair nga sunod man nga nakakas sa pwesto pagkatapos nagputok ang kontrobersyal nga land deal.
Dugang pa sini nga ang nasambit nga imbestigasyon ginpatigayon agud matumod kun ano nga mga kaso ang nagakadapat nga ipamatbat batuk sa duha ka mga OWWA executive nga ginapahayag naulamid sa nasambit nga proyekto.
Una naman nga gin-athag ni Sec. Cacdac nga ginpangkakas ang duha bangud sa maanomalya nga transaksyon, kag indi basta nga nag-resign sa tagsa nila ka pwesto.
Madumduman nga nadiskubrehan ang nasambit nga land deal matapos ini nga ginpilit sang anay management sang OWWA sa pihak sang indi pag-aprubar sang Board of Trustees sang OWWA, isa sa nagapanguna nga requirement sa idalum sang Republic Act 10801 ukon ang OWWA Act.
Ang nasambit nga duta ang patindugan kuntani sang isa ka halfway house para sa mga overseas Filipino worker.
