Patay ang isa ka lalaki samtang duha ang pilason matapos nga nabungguan sang motorsiklo ang naga-park nga tricycle sa Sitio Palanas, Barangay Basiao, Ivisan, Capiz.
Ang biktima nga napatay amo si alyas “Ramy”, 32-anyos, samtang pilason naman si alyas “Rey”, 39-anyos nga lunsay mga residente sang Brgy. Basiao, Ivisan, Capiz.
Samtang ang driver suspek naman amo si alyas “John”, driver sang K3 bigbike, 21-anyos kag residente sang banwa sang Pontevedra.
Sa interview sang Bombo Radyo kay PMSG Eduard Peter Hari-on, imbestigador sang Ivisan PNP, ginpahayag sini nga samtang ginasubay sang driver suspek ang dalanon nagikan sa Brgy. Basiao padulong kun tani sa sa banwa sang Ivisan hinali nalang nga nadulaan ini sang kontrol sa pagmaneho.
Bangud sa natabo nga insidente, nabungguan ni alyas John ang Suzuki Smash kag nadalahig man ang isa ka tricycle nga naka-park sa higad nga karsada kun sa diin nagapungko si alyas Ramy sa likod sang side car kag amo man si alyas Rey nga nagapungko sa motor sang amo nga tricycle.
Bangud sa mabaskog nga impact, nagtabog ang Suzuki Smash kun sa diin naigo si alyas Rami rason sang iya sini nga kamatayon.
Samtang nag-angkon naman sang minor nga pilas si alyas Rey nga gilayon man nga naggwa sa hospital.
Nagapabilin naman sa isa ka pribado nga ospital si alyas John para sa dugang nga pagbulong.
Nahibaluan nga yara sa impluwensya sang makahulubog nga ilimnon si John sang natabo ang aksidente.
Sa karon, wala pa sang pahayag ang pamilya sang biktima kun desidido ini nga magpasaka sang kaso.
