Aminado nga anay na nga nagagamit sang illegal nga droga ang isa sa mga nadakpan sa ginkasa nga buybust operation sa Malipayon Village, Barangay Tiza, Roxas City.
Matandaan nga nadakpan sanday Aldren Dela Cruz, 32-anyos residente sang nasambit nga lugar kag Jemmer Asignacion, 35-anyos kag residente naman sang Barangay I, sining syudad.
Sa interview sang Bombo Radyo kay Asignacion, ginpahayag sini nga indi niya tuman ka kilala ang subject person sa amu nga operasyon nga si John Martin Legaspi.
Suno pa diri nga sadtong tion nagpadulong lamang ini sa lugar nanday Legaspi agud mag-update sang inugbayad sa iya motorsiklo nga nakaprenda diri.
Apang dako na lamang ang iya kakibot sang nag-abot ang mga otoridad kag hinali na lamang sila nga ginpasulod sa puluy-an.
Sa karun, nagapabilin sa karsel sang Roxas City PNP sanday Dela Cruz kag Asignacion.
Samtang, nagapadayon pa ang hot pursuit operation sa nasambit nga subject person.
