Indi safe kaunon ang mga isda sa dagat sang mga probinsya nga apektado sang oil spill, suno sa Bureau of Fisheries and Aquatic Resources (BFAR) sang Department of Agriculture (DA).
Ang amo nga paandam ang ginpoahayag sang BFAR sa Bataan Oil Spill Bulletin No. 2 nga ginpaguha sang tinalikdan lang nga adlaw sang huwebes, Agosto 1.
Sa nasambit nga advisory, ginapahalong sang BFAR sa pagkaon sang marine products ang mga apektado nga lugar sa Central Luzon, Calabarzon, kag National Capital Region (NCR) matapos makitaan sang kemikal sang petroleum products gikan sa sample sang isda nga nadakpan sa Noveleta kag Rosario, Cavite sandig sa sensory evaluation analysis sang BFAR.
Suno diri, indi naman kontaminado ang mga isda sa Tanza kag Naic, Cavite sang ginhiwat ang pagpangusisa.
Suno sa BFAR, padayon ang monitoring sang mga ini sa epekto sang tumagas nga langis sa mga isda gikan sa motor tanker sumugod sang lumubog ini agud masiguro nga indi kontaminado ang mga lamang dagat sa mga nasambit nga lugar.
Suno naman kay Cavite Governor Jovic Remulla, gina-istudyohan pa sang mga ini kun magapasaka ini sang kaso batuk sa tanan nga persona nga yara sa likod sa kapabayaan sa nasambit nga insidente bangud sa perwisyo nga gintuga sini sa kadagatan kag pangabuy-anan sang mga tripulante sa mga nasambit nga lugar.
