Nagpanumpa ang Iranian Foreign Minister Abbas Araqchi nga gamiton ang tanan nga opsyon agud depensahan ang iya soberanya matapos nga ginbombahan sang US ang tatlo sang iya nuclear facilities.
Bilang balos, ang Iran nagpalupok sang dugang nga mga missile sa Israel, nga nag-igo sa mga syudad sang Tel Aviv kag Jerusalem, nga nagtuga sang kahalitan sa mga puluy-an kag nagpilas sa mga sibilyan.
Ang resulta nga pagpamomba nagbilin sang 16 ka mga tawo nga napilasan.
Nagpaandam ang Iran nga indi ini mapuhag sang Amerika kag gintawag sini nga ilegal ang opensiba sang US. Suno sa ila, wala na sang nabilin nga radioactive materials nga mahimo maglupok sa mga pasilidad pareho sang Natanz, Isfahan, kag Fordow.
Sa pihak nga bahin, ginpabugal ni Trump ang iya “madinalag-on” nga operasyon samtang nagapamahog nga sundon ini sang dugang nga pagpamomba kon indi magsungka ang Iran.
Nahibaluan nga ang U.S. ginaalegar nga naggamit sang 30 ka Tomahawk missiles kag bunker-buster bombs sa pagguba sang mga pasilidad nukleyar sang Iran.
Base sa datos, masobra 430 ka mga tawo ang nareport nga napatay sa Iran kag 24 sa Israel halin sang nagsugod ang inaway sang Hunyo 13.
Ang mga lider gikan sa nagkalainlain nga mga pungsod nagpabutyag sang kabalaka, samtang ang mga tensyon sa Natung-an nga Sidlangan padayon nga nagalala.
Nagpanawagan man ang United Nation sang gilayon nga ceasefire agud malikawan ang mas malapad nga inaway.
