ROXAS CITY – Liwat nga ginsulod sang wala pa matumod nga mga kawatan ang merkado publiko sa Brgy. Poblacion banwa sang Ivisan kahapon nga adlaw.
Ginkilala ang mga biktima nga sanday Ronie Pimentel kag Eden Diestro lunsay residente sang Brgy. Cudian sa nasambit nga banwa.
Sa report nga nakuha gikan sa Ivisan MPS, duwa ka mga suspetsado ang nakit-an sa CCTV footage nga narekober sa isa ka puwesto sang biktima kag diri nakit-an nga nakasuksok sang facemask kag bonet ang mga suspek.
Dugang diri, ginabulubanta nagapang-edaron sang 30-40 anyos, may kataason nga 5 ft. and 4 inches ang mga suspetsado kag ginlaragway may alom sa nawala nga bahin sang guya ang isa.
Samtang posible naman suno diri nakasulod ang mga suspetsado sa atop sang nasambit nga merkado kag sang sa sulod na, ginpuwersa bukas ang mga puwesto sang mga biktima kag ginpangkawat ang nagkalain-lain nga baligya nga nagabalor sa kabug-usan nga P10,000.
Sa karon, padayon ang imbestigasyon sang kapulisan sa pagkakilanlan sang suspek para maaresto kag mabalik ang ila ginpangkawat.
