ROXAS CITY – May bag-o na nga hepe ang Jamindan Municipal Police Station matapos nga gintal-osan ni Police Lieutenant Jobert delos Reyes ang anay hepe nga si Police Captain Tobias Garfin.
Sa interview sang Bombo Radyo kay delos Reyes, ginsiling sini nga igapadayon sini ang maayo nga pagpanerbisyo sa pumuluyo kag ipabilin ang katawhay kag kalinong sa nasambit nga banwa kasubong sang iya pagserbisyo sa banwa sang Dao kun sa diin nagpungko man ini bilang Officer-in-Charge.
Ginasiguro man sini nga mas pasangkaron pa ang kampanya batuk sa kriminalidad kag iligal nga droga ilabi na nga gindeklarar na nga drug-free municipality ang banwa sang Jamindan.
Nagapanawagan man ang hepe sang kooperasyon sa mga pumuluyo kag indi magkahadlok nga magpangayo sang bulig sa mga kapulisan bangud trabaho sang mga pulis nga ipabilina ang katawhay kag kalinong sang palibot.
Mahibaluan nga ginhiwat ang turnover of command ceremony sang Pebrero 16 nga ginpangunahan ni Police Colonel Jerome Afuyog Jr, Acting Provincial Director- CPPO kun sa diin ginpakilala na bilang bag-o nga hepe sang Jamindan MPS si PLt. Jobert delos Reyes.
