Wala napunggan sang Golden State Warriors ang comeback win sang Utah Jazz sa katapusan nga tatlo ka minutos, pamaagi agud iposte ang 3-point win.
Sa katapusan nga 2 minutos kag 40 segundo sang hampang hawid pa sang Warriors ang 11 points nga abanse kung sa diin sa iskor nga 122 – 112.
Diri na ginsuguran ni Utah guard Jordan Clarkson ang halos wala untat nga opensa kag asud-asud nga pagpasulod sang 2-point kag 3-point shots ang mga Jazz player.
Apisar nagbalos si Stephen Curry sang magkasunod nga layup, wala sang iban nga player sang Golden State nga nakabulig agud itib-ong ang iskor sang Warriors.
26 segundo antes matapos ang hampang, hawid na sang GS ang 2-point lead, 126 – 124 apang napasulod ni Keyonte George ang isa ka corner three.
Bangud sini, wala na nakabawi pa ang Warriors kag ginbulsa sang Utah ang kadalag-an sa iskor nga 131 – 128.
Sa nasambit nga hampang, nagkamada sang 31 points si Clarkson samtang 26 points naman kay George kag 15 points, 11 rebs ang para kay Walker Kessler.
Samtang, nausik naman ang panibag-o nga 32-point performance ni Stephen Curry, kalakip ang 29 points sang sophomore nga si Brandin Podziemski.
Sa karun, hawid na sang GS ang 25 – 25 nga kartada samtang 12 – 37 naman ang win-loss record sang Jazz.
