Nagpatigayon ang joint clearing operation ang mga katapo sang Land Transportation Office Roxas City, Roxas City Government, Barangay Council sang Barangay Dayao, DPWH 1st District Engeneering Office, kag Highway Patrol Group sa mga manugbaligya sa circumferential road sa bahin sang Barangay Dayao, Roxas City.
Sa interview sang Bombo Radyo kay Allan Aguirre, Administrative Aide sang Land Transportation Office Roxas City, iya ginpahayag nga ang nasambit nga mga stalls ang makabig na nga obstruction sa dalan bangud nagatuga na ini sang pagbug-at sang trapiko ilabi na nga madamu sang mga salakyan ang naga-agi sa lugar.
Suno sa iya, naintindihan nila ang pagkinahanglan sang palangabuhian sang mga vendor apang indi na husto nga ginasakop na sang mga stall ang kabug-usan ang dalan nga kuntani alagyan sang mga motorista.
Pahayag pa niya, ang ini nga tikang agud masiguro ang seguridad sang mga bumalakal, vendors, mga motorista kag mapabilin ang matawhay nga dalagan sang trapiko sa lugar.
Nahibaluan nga igasaylo ang nasambit nga mga manugbaligya sa bypass road pakadto sa Barangay Cagay, Roxas City agud mahatagan sila sang mas maligwa nga lugar.
