Pagasuguran sang Justice panel ang hearing batuk sa apat ka impeachment complaint batok kay Vice President Sara Duterte sa Marso 2 tubtob 4.
Ini ang ginkumpirma ni House Committee on Justice kag Batangas Rep. Gerville “Jinky Bitrics” Luistro.
Suno kay Luistro, una nga hibaluon sang komitiba kun bastante ang porma kag bastante ang kaundan sang mga reklamo.
Sa tion nga matapos ang deliberasyon sa una nga adlaw, ini ang gilayon nga magasaylo sa pagrepaso sang kaundan sa masunod nga adlaw.
Kon indi matapos, magapadayon ang hearing sa mga masunod pa nga inadlaw.
Mahimo man nga magpadayon ang mga hearing apisar nga yara sa recess ang Kamara, kun kinahanglanon.
Isa ka importante nga proseso ang impeachment gani indi dapat nga ma-delay.
Pahayag niya,wala nakasugod gilayon ang komitiba sini nga semana bangud kinahanglan pa nga kopyahon kag ipanagtag sa tanan nga mga miyembro ang mga kopya sang impeachment complaints.
Paathag ni Luistro, ang apat ka mga reklamo ang dungan nga talakayon sa isa lang ka impeachment proceeding, apang indi ini physically consolidated.
Ang tagsa ka reklamo kag tagsa ka basehan ang pagadiskusyonan sang separado, apang ang pagboto sang mga katapo iga-base sa kabug-usan sang tagsa ka reklamo sang impeachment.
Dugang pa ni Luistro, kun makapasar ang mga reklamo sa review of form and content, hatagan sang 10 ka adlaw ang respondent agud makasumiter sang sabat.
May tatlo ka adlaw man agud magsabat ang complainant kag may tatlo ka adlaw nga rejoinder ang respondent.
Mahimo nga magdugay pa ang proseso bangud may yara sang apat ka mga impeachment complaints kag mahimo nga madamo man sang mga basehan nga pagatalakayon.
Nagadepende suno sa iya ang kalawigon sang hearing kun bala makapasar ang mga reklamo sa gintalana nga criteria.
