Kumpyansa si Deputy House Speaker Fredenil Castro nga suportahan sang mga mamalidha ang extensiyon sang Martial Law ni Pres. Rodrigo Duterte sa Mindanao sa ila patigayunon nga special session sa Sabado Hulyo, 22.
Suno kay Castro napat-od sini nga makakuha sang daku nga suporta gikan sa mga mamalidha ang presidente kaangay sa ginpakita nga suporta sang gindeklarar pa lamang ang Martial Law.
Ginpahayag sini nga daku ang mabulig sang Martial Law agud mapapas ang pwersa sang mga terorista nga Maute group nga padayon pa nga nagabato sa tropa sang gobyerno.
Gindugang pa ni Castro nga daku man ang mabulig sang ginapatuman nga Martial Law sa patigayunon nga clearing operation sa tion nga maubos na ang pwersa sang mga terorista nga grupo sa rehiyon sa diin nagadiutay na ang ila numero kag ginakutaan.
Nagakadapat man suno pa sa mamalidha nga magapabilin ang gahom sa mga otoridad agud mapunggan ang pagsulod sang iban pa nga mga terorista nga may plano nga magsabwag sang kalakasan sa Mindanao kag ipasiguro nga wala na sang pamahog sang terorismo sa rehiyon.
Mahibaluan nga sa Sabado, magapatigayon sang special session ang mga mamalidha sa diin pagahatagan sila sang kahigayunan nga ipalayag ang ila sentimiyento tuhoy sa extension sang Martial Law.
Positibo man si Castro nga pagabawion ni Duterte ang gindeklarar nga Martial Law sa tion nga wala na sang pamahog sang terorismo kag makita nga yara na sa hilway nga kahimtangan ang mga pumuluyo.
