ROXAS CITY – Pagabawion sang provincial government ang mga salakyan nga ginpanghatag sa pila ka mga kabarangayan sa probinsya sang Capiz nga proyekto ni Outgoing Governor Evan “Nonoy” Contreras.
Sa interview sang Bombo Radyo kay 1st district Board Member Weldie Apolinario, ang “Kabalaka Transport Vehicles” ang sa gihapon propedad sang provincial government kag indi insakto ang pagpanghatag sang gobernador.
Suno diri, salabton sang gobyerno probinsyal pananglitan nga maaksidente ang nasambit nga mga salakyan gani pagabawion ini sa subong agud mapatigayon ang insakto nga pag turn-over, mahatagan sang Memorandum of Agreement (MOA), guidelines sa operation kag maintenance, kag mga dokumento nga magaserbe sa opisyal nga mangin propedad sang kabarangayan.
Ginpanginwala man ni BM Apolinario nga magalain ang buot sang mga punong barangay sa pagbawi sang nasambit nga mga salakyan bangud nahibaluan man sang mga ini ang mga proseso bilang mga nagaserbisyo sa gobyerno.
Sa pihak nga bahin, wala naman sang komento si Governor-elect Oto Castro angut sa pagbinawiay apang nagsiling ini nga indi bastante ang mga salakyan kag posible dugangan ini sa iya administrasyon.
Dugang diri, may yara sang Commision on Audit (COA) findings kun sa diin nagaguha nga indi tama ang pag-release sang rescue vehicles ni Contreras.
Aprubado naman ang resolusyon sa pagbawi sang mga salakyan kag yara na ini sa posesyon sang Provincial General Services Office (PGSO) nga magafacilitate kag ipahamtang sa stadium agud mainventory kag maplastar ang insakto nga disposiyon.
