ROXAS CITY – “If you want to see your country free, free yourself from ignorance.’
Ini ang ginbuy-an nga tinaga ni Dr. Sarreal Soquiño, History Professor sa Filamer Christian University (FCU) kadungan sa paghanduraw sa mga natabo sa panahon sang EDSA People Power Revolution sang 1986.
Suno diri, importante nga komemoraron sang mga Pilipino ang EDSA People Power, isa ka maragtason nga hitabo sa pungsod halin Pebrero 22 – 25, 1986 bangud ini ang nangin resulta sa pagpanikasog sang Anti-Marcos Group nga untaton na ang martial law kag pahalinon sa pwesto si anay Presidente Ferdinand Marcos Sr.
Pahayag ni Soquiño, namuklat ang mga mata sang mga kabataan sa sala kag pagpamigos sang administrasyon ilabi na sang gindeklara ang Proclamation 1081 ukon Martial Law nga ginsuguran sang madugo nga kinagamo sa Pilipinas, wala-tuo ang nababalhag nga kapintas, korapsyon, pagkadula sang ila mga himata, kag pagpamalabag sa kinamatarong sang mga pumuluyo kasubong sang freedom of speech.
Daku ang nangin papel sang mga kabataan sang amu nga panahon ilabi na pwersahan nga ginpasara sang anay presidente ang masobra 400 ka mga newspaper kag broadcast center, ginpa-hipos ang mga pulitiko amu man ang oposisyon sa nagapungko nga administrasyon.
Nangin vigilante ang mga kabataan sa pagprotekta sa kinamatarong sang mga Pilipino partikular na ang estudyante nga nagikan sa mga dalagkuan nga unibersidad sa Metro Manila kasubong sang University of the Philippines, University of Santo Tomas, Ateneo de Manila kag madamo pa.
Bangud sini, nag-ugyon ang mga kabataan halin sa mga elite kag prominent schools agud magpatigayon sang hublag-protesta agud pamatukan ang pagdumala ni Marcos Sr.
Ini ang nagtulod agud ma-engganyo ang mga mangunguma kag ma-inspire ang Simbahang Katoliko nga ipakig-bato ang kinamatarong sang kada isa kag tapuson na ang harassment.
Nagapati si Soquiño, sa amu nga panahon matuod ang nangin pahayag sang baganihan nga si Dr. Jose Rizal nga ‘Ang Kabataan ang pag-asa ng Bayan’ bangud ang kabataan ang nagserbi nga liyabe agud mangisog ang mga Pilipino nga maka-guwa kag makaluwas sa mga kamot sang diktador nga pagpamuno ni Marcos Sr.
Aminado ini, sa karon nga panahon daw kaangay wala na ginahatagan sang impormasyon ang EDSA kag wala na sang interest ang mga kabataan sa nagakahinabo sa Pilipinas.
“They should take interest on what is happening on our society, not only on our society, but also take interest on what’s happening in world affairs’.
Dugang pa sini nga kun luyag sang Pilipino sang pagbag-o, kinahanglan mahibaluan sang tagsa-isa ang matuod nga nagakahinabo sa pungsod.
Matandaan bangud sa EDSA People Power Revolution, nagtapos ang rehimen ni Marcos Sr. matapos nga nag-daug si anay Presidente Cory Aquino pinaagi sa snap election.
Kasunod sini ang pagbiya sang pamilya Marcos sa Malakanyang kag nagpadulong sa Hawaii.
