ROXAS CITY – Nagapabilin nga positibo sa gihapon sa red tide ang mga kalalawran sa probinsya sang Capiz.
Ini ang ginpahayag ni Provincial Director Edwin Javier sang Bureau of Fisheries and Aquatic Resources (BFAR) – Capiz sang mainterview sang Bombo Radyo.
Suno diri, sa pihak sa weekly sampling nga ginapatigayon sang ahensya nagapabilin nga mataas ang toxicity level sa mga kalalawran nga sakup sang probinsya.
Nagakahulugan nga delikado kag ginadumilian sa gihapon ang pagharvest, pagbaligya kag pagkaon sang anuman nga sahi sang panginhason bangud sa peligro nga dala sini sa ikaayong lawas.
Kaangut diri, nakalab-ot naman sa igtalupangod nila nga may pipila ka mga persona nga nagapalusot baligya sang panginhason sa mga kaiping nga probinsya.
Ginapangabay ni Javier ang mga naga-transport sang panginhason nga ipa-iway ang buluhaton bangud makatuga ini sang halit sa ikaayong lawas sang isa ka tawo.
Samtang, nagapadayon naman ang tagtaganay sang food packs sa mga manugpanginhas nga apektado sang red tide nagikan sa provincial government kag Gerry Roxas Foundation.
