ROXAS CITY – Opisyal na nga ginlunsyar ang ‘Kaligkasan’ ukon Kaligtasan at Kalikasan Volunteers Program.
Ini ang ginpahayag ni Police Executive Master Sergeant Donna Asmod, ang tagpamaba sang Capiz Police Provincial Office sang mainterview sang Bombo Radyo Roxas.
Ang nasambit nga aktibidad ang ginpatigayon sa Medinas Compound sa Barangay Cagay, Roxas City.
Suno kay Asmod ang ini nga aktibidad ang nagapakita sang suporta sang hanay sang pulisya sa mga programa sang Department of Environment and Natural Resources Office (DENR) sa pag-amlig sa dunang manggad sang probinsiya ilabi na ang malapad nga kasubaan sa palibot sang probinsiya sang Capiz.
Sa amo nga aktibidad suno kay Asmod, gintalakay ang mga programa kun sa diin ginaduso ang environmental protection kag reservation.
Ang nasambit nga aktibidad ang ginpasakupan man sang mga opisyales gikan sa magkatuhay nga mga kabaranggayan sa siyudad sang Roxas.
