Ginpahayag ni House of Representatives spokesperson Atty. Princess Abante, nga daku ang pagkabalaka sa plano sang Senado nga botohon ang desisyon sang Korte Suprema nga nagadeklarar nga unconstitutional ang impeachment complaint batuk kay Vice President Sara Duterte.
Ini kon ang pagboto sang Senado sa Agosto 6 magpadayon nga wala gani nagahulat nga maubos sang Kamara ang tanan nga magamit nga legal nga mga remedyo.
Ginpanindugan ni Atty. Abante nga indi pa pinal ang desisyon sang Korte Suprema. Ginsiling man sini nga ang Kamara natalana pa nga mag-file sang motion for reconsideration sang desisyon sang korte bilang isa ka representative body nga ginhatag sang konstitusyon nga may eksklusibo nga gahum kag awtoridad sa pag-umpisa sang impeachment.
Una na ginreport nga sa Lunes, Agosto 4, ginalauman nga maga-file sang motion for reconsideration ang Kamara nga ginarepresentar sang Office of the Secretary General (OSG).
Kaangot sini, ginhingyo sang Kamara ang mga Senador nga mag-exercise sang due diligence kag pasensya kag tugutan nga mag-unfold ang judicial process.
Suno sa iya, ang bisan ano nga wala pa sa tion nga aksyon, pareho sang natalana nga pagboto sang Senado sa desisyon sang SC, mangin isa ka pagbiya sa pagbista sa impeachment, nga mahimo makabig nga isa ka pagbalewala sa nagakaigo nga proseso. Suno sa iya, mahimo ini nga i-interpret bilang isa ka political shortcut nga nagaguba sang konstitusyonal nga papel sang Kamara.
Sa katapusan, ang opisyal sang Kamara nagsiling nga sila komitido sa pagginahum sang kasuguan kag himuon ang tanan nga legal nga mga remedyo sa pag-amlig sang iya mandato sa idalom sang konstitusyon kag siguraduhon nga ang salabton indi pagbalewalaon.
