Ginpanindugan sang kampo ni anay Negros Oriental Representative Arnolfo ‘Arnie’ Teves Jr. nga wala sang intensyon nga magpalagyo ang anay kongresista.
Ini ang ginkumpirmar kag ginhatagan pagtamod sang iya abogado nga si Atty. Ferdinand Topacio, nga ipalab-ot sa Department of Interior and Local Government Secretary Jonvic Remulla.
Sa diin luyag kuno sang ila kampo nga klaruhon nga indi ini lakip sa plano sang anay kongresista nga himuon samtang nagapabilin ini sa ospital.
Ginpahayag ni Atty Ferdinand Topacio nga malabo ang posibilidad nga matabo ini, ilabi pa nga may yara sang tubo halin sa iya ilong pakadto sa sulod sang tiyan sang iya kliyente.
Dugang pa niya nga ini nga tubo ang konektado sa tatlo ka botelya sang bulong nga gin-administrar paagi sa ugat, amo kon ngaa indi pa amo sina kabaskog si Teves sa karon.
Ginpahayag nga indi man ini makadalagan agud makapalagyo sa Philippine General Hospital sa diin gindala siya kag gin-operahan.
Dapat dumdumon nga nagpaidalom sa operasyon ang anay kongresista matapos naka-eksperyensya sang tuman nga pagsakit sang tiyan samtang yara sa iya detention center sa Camp Bagong Diwa, Taguig City.
