Nagsumiter ang kampo ni anay Presidente Rodrigo Duterte sa International Criminal Court (ICC) sang panibag-o nga batch sang ebidensya sa kaso nga ila ginapangatubang angut sa ila war on drugs.
Base sa isa ka dokumento nga ginsumiter sang Nobyembre 5, may 13 ka sahi sang ebidensya ang ila ginsumiter sa Office of the Prosecutor kag Office of Public Counsel for Victims (OPCV) nga ginpirmahan ni Atty. Nicholas Kaufman, abogado ni Duterte.
Apang nagapabilin nga confidential ang nasambit nga mga dokumento kag para lamang ini sa depensa, prosekusyon kag OPCV.
Ini na ang ikaduha nga batch nga ginsumiter sang kampo sang anay presidente, ang una sadtong Setyembre nga may unod nga 29 items.
Madumduman nga preso subong sa The Hague, Netherlands ang anay presidente kun sa diin ginpasakaan na siya sang kaso sang ICC Prosecutor sang 49 ka murders kag attempted murders bangud sang iya kampanya kontra iligal nga druga sang siya pa ang alkalde sang Davao kag presidente sang Pilipinas.
