Gin-ako sang kampo sang naka-detained nga si Pastor Apollo C. Quiboloy nga posible ipatuman ang extradition bisan pa nga may gina-atubang ini nga pending nga mga kaso.
Sa exclusive interview sang Bombo Radyo kay legal counsel ni Pastor Quiboloy nga si Atty. Israelito Torreon, nag-ako nga indi ini imposible nga matabo.
Suno sa iya, may gahum ang estado sang pungsod nga ihatag ang extradition request sang America para sa pastor.
Nagapangatubang ang kontrobersyal nga televangelistini sang pila ka mga kaso kaangay sang child sex trafficking, fraud, kag iban pa nga karon ginapangita man sa pungsod.
Samtang ginhatagan pagtamod ni Atty. Torreon nga apisar posible nga mapadala sa Estados Unidos ang mga akusado, option sa gihapon suno sa iya nga tapuson anay sang pungsod ang mga pending nga kaso sini antes istoryahan ang extradition issue.
Samtang, ginpahayag sini nga wala pa sila sang may nabaton nga dokumento ukon pormal nga kopya sang ‘Extradition Request’ sang Estados Unidos.
Ginpahayag sini nga ginahulat pa nila ini kadungan sang panawagan sa gobyerno nga respetuhon anay ang progreso sang kaso sa pungsod antes magdesisyon sa hingyo gikan sa dumuluong nga pungsod.
Samtang, naghingyo naman ang kampo ni Pastor Quiboloy sa Estados Unidos nga respetuhon ang soberanya sang pungsod may kaangtanan sa ila extradition request.
Nagpanindugan man ang iya abogado nga si Atty. Israelito Torreon, nga yara na sa korte sang Pilipinas ang mga kaso sang iya kliyente, gani suno sa iya dapat pabay-an lang sila.
Sa karon priso na ang akusado nga si Pastor Apollo Quiboloy bangud sa mga reklamo sang pagpang-abuso kag human trafficking sa pungsod.
