Sa pihak sang mga nagalutaw nga bag-o nga biktima ni KOJC leader Pastor Apollo Quiboloy, kumpyansa gihapon ang kampo sang pastor nga ibasura sang korte ang kaso nga child and sexual abuse nga gin-file batuk sa ila nga kliyente.
Ang nasambitan nga kaso ang gin-file sa Quezon City Regional Trial Court Branch 106.
Ginhimo sang abogado ni Quiboloy nga si Atty. Israelito Torreon ang pahayag sang nagtambong ini sa hearing sang kaso sang Miyerkules.
Nagapati ini nga ibasura sang korte ang kaso kaangay sang kaso nga ginpangatubang ni Quiboloy sang 2020 sa Davao Prosecutor’s Office kun sa diin ginbasura ini.
Maluwas sa kaso nga child and sexual abuse, nagapangatubang man si Quiboloy sa kaso nga qualified human trafficking sa Pasig City RTC kun sa diin wala sang ginarekomendar nga pyansa para sa temporaryo sini nga kahilwayan.
Naga-apelar man ang kampo sang kontrobersyal nga pastor sang isa ka house ukon hospital arrest bangud sa edad sang pastor.
