IVISAN, CAPIZ – Arestado ang 42-anyos nga lalaki nga taga Sitio Marubrob, Barangay Majanlud, Sapian matapos madakpan nga nagaduso sang iligal nga droga sa Barangay Malocloc Norte, Ivisan, Capiz.
Sa interview sang Bombo Radyo kay Police Major Ruby Magallanes, hepe sang Ivisan PNP, narekober gikan sa arestado suspek ang tatlo ka sachet sang suspected shabu nga may kabug-aton nga tatlo ka gramo kag may standard drug price nga ₱20,400.
Suno kay Magallanes, gin-ako sang arestado nga kapigaduhon, kakulangan sang trabaho, kag nakaagi ini aksidente sa ubra rason nga nagtulod sa iya agud sudlon ang pagbaligya sang droga.
Dugang pa sang natungdan, gintuad sang barangay kag intelligence network nga madugay na nga ‘involved’ ang arestado sa iligal nga aktibidad antes pa man siya nadakpan.
Nagapabilin sa kustodiya sang Ivisan Municipal Police Station ang arestado para sa nagakaigo nga disposisyon.
Interviewed by: Bombo Sunnie Mae Constantino Batencila
