Patay ang indi magnubo sa 30 ka-tawo, kalakip ang mga kababainhan kag mga bata, matapos ang serye sang airstrikes sang Pakistan Air Force sa Matre Dara, isa ka nayon sa Tirah Valley sa probinsya sang Khyber Pakhtunkhwa sang Lunes sang kaagahon.
Suno sa mga report, walo(8) ka LS-6 precision bombs ang ginlagbong sang mga eroplano sang military takna las-2 sang aga.
Ginaalegar target sang operasyon ang mga ginasuspetsahan myembro sang Tehreek-i-Taliban Pakistan (TTP) nga ginapahayag may talaguan sang mga armas kag bomb-making materials sa nasambit nga lugar.
Sa pahayag ni Police Officer Zafar Khan, ginkumpirma sini nga ang compound nga gin-igo amo ang ginahukmungan sanday Aman Gul kag Masood Khan — mga lokal nga kumander sang TTP. Nahibaluan man nga ginagamit sang mga militante ang mga sibilyan bilang “human shield” kag nagatipon sang mga armas sa mga mosque sa nagkalin-lain nga distrito.
Nadalasa ang mga puluy-an sang mga sibilyan kadungan sang pag-target sa mga militante, rason nga madamo sang napatay kag napilasan.
Sa subong, wala pa sang opisyal nga pahayag ang gobyerno sang Pakistan kaangot sang insidente.
