Yara sa 5,000 tubtob 10,000 nga mga tsuper kag operator sang transport cooperatives ang magapakigbahin sa “unity walk” subong nga adlaw sang Lunes, Agosto 5, para ipahayag ang pagpamatok sang mga ini sa resolusyon sang Senado nga nagrekomendar sang pagsuspinde sa Public Utility Vehicles Modernization Program (PUVMP).
Magatipon ang mga pro-PUVMP group sa Mabuhay Welcome Rotunda sa Quezon City sa takna alas-6 sang aga kag magamartsa padulong sa Palasyo sang Malacañang.
Suno sa Kooperatiba kag Korporasyon sang Alyansang Pilipino para sa Modernisasyon (AKKAP MO), may yara man sang dululungan nga protesta sa iban nga bahin sang pungsod kaangay sang Cagayan de Oro kag Cebu.
Ginsiling man sang Alliance of Transport Operators and Drivers Association of the Philippines (ALTODAP), nga wala mahatagan sang tyansa nga maghambal ang mga pro-PUVMP group sa hearing sang Senado.
Una na diri, ang 22 sa 23 senador ang nagperma sa isa ka resolusyon nga nagapanawagan sa temporaryo nga suspensiyon sang PUVMP.
