Ginpanindugan ni punong barangay Elizabeth Santiago sang Barangay Dinginan, sining syudad nga wala sang koordinasyon sa iya ang distribusyon sang bugas nga ginasiling ayuda sang Roxas City government sa mga residente sang Barangay Dinginan.
Suno kay Kapitan Santiago nga ang natabo kahapon nga adlaw nga distribusyon sang bugas ang ginkakibot sini bangud natabuan nga yara siya sa barangay hall.
Ginkatingala sang opisyal ang pagdinaguso sang pila ka mga residente sa diin sang iya ini ginpamangkot, gintuad sa iya nga makuha sila sang bugas nga ginapanagtag sang gobyerno sang syudad sa balay ni anay barangay kapitan Iluminado Corros.
Ginpahayag ni Kapitan Santiago nga halin sa pagsugod sang listahanay sang pangalan ang wala ginpahibalo sa iya.
Ginbuyagyag man sini nga ginpili lamang ni Barangay Kagawad Wilson Alinsog ang ginsulat sini sa listahan sa diin kun sin-o ang iya napusuan, amo ang makabaton sang ayuda sang gobyerno sang syudad.
Wala mauyunan sang opisyal ang ginhimo ni Kagawad Alinsog nga wala ginlakip sa listahan ang pigado nga mga pumuluyo nga dapat kuntani pasulabihon bangud sila ang nagakinahanglan sang ayuda sang gobyerno.
Samtang nahibaluan gikan sa opisyal nga ginsugat kag ginpilit siya sang staff sang gobyerno sang syudad kag ginpakadto sa balay ni anay Kapitan Corros sa diin ginpatigayon ang distribusyon sang bugas.
