ROXAS CITY, CAPIZ- Naglab-ot na sa 12 ka mga banwa sa probinsya sang Capiz ang free ukon hilway na sa kaso sang African Swine Fever nga balatian sang mga baboy subong nga Oktubre 2025.
Sa interview sang Bombo Radyo kay Dr. Lloyd Burata, Veterinarian V sang Capiz Provincial Veterinary Office, iya ginpahayag nga apisar may mga lugar na sa probinsya ang ASF-free, nagapabilin sa gihapon ang mataas nga risgo kag pagpamahog sa pag-ataman sang baboy bangud sang nasambit nga balatian.
Suno kay Burata, apisar nga wala na sang kaso sang ASF, ginakabig sa gihapon ini nga yara sa “pink zone” sa diin kinahanglan sa gihapon nga padayon nga magmonitor sa estado sang mga hinuptanan sini nga mga baboy.
Nahibaluan nga ang Roxas City, Cuartero, Dao, Dumalag, Dumarao, Jamindan, Maayon, Mambusao, Pontevedra, President Roxas, Sigma, kag Tapaz ang mga lugar na sa subong ASF-free na.
Ang African Swine Fever ang isa ka sahi sang virus nga madasig makatapon sa mga baboy, kag kun iguon ang mga ini, sigurado gid nga mapatay. Subong man, indi ini delikado sa nga balatian sang baboy sa tawo.
Madumduman nga sang nagsulod ang ASF sa Capiz, linibo ka mga hinuptanan nga baboy ang napatay, kag nagtuga ini sang dako nga lugi sa industriya sang babuyan sa probinsya.
Isa man ini sa mga rason sang pagtaas sang presyo sang karne sang baboy bangud sa kakulangan sang lokal nga suplay kag ang pag-angkat halin pa sa malayo nga mga lugar.
Interviewed by Bombo Francis Biñas
