ROXAS CITY, CAPIZ- Ginpakigbahin sang isa ka doktor nagikan sa Capiz Provincial Health Office nga padayon nga nagadamo ang numero sang mga Capizeño nga nagasupreher sang balatian nga diabetes.
Sa interview sang Bombo Radyo kay Doctor Leah Del Rosario, Provincial Health Officer I sang Capiz Provincial Health Office, iya ginpahayag nga ang balatian nga diabetes ang isa man sa mga rason masami sang kamatayon sang mga tawo indi lamang diri sa pungsod Pilipinas kundi sa bilog nga kalibutan.
Suno kay Del Rosario, ang diabetes ang isa ka balatian kun sa diin nagataas ang sugar sa dugo bangud sa kulang ukon indi maayos ang paggamit sang lawas sa insulin, ang hormone nga nagakontrol sa blood sugar.
Pahayag nya, may yara sang apat ka sahi sang diabetes sa diin amo ang Type 1 Diabetes ukon ang Juvenile Onset Diabetes; Type 2 Diabetes; Gestational Diabetes kag Secondary Diabetes sa diin ang kada-isa may yara sang level of risks.
Sa palaabuton nga Nobyember 14, igaselebrar ang World Diabetes Day sa pungsod Pilipinas nga may tema nga ‘Diabetes and well-Being’ sa diin katuyuan sini nga pasangkaron ang ihibalo sang publiko natuhoy sa diabetes.
Nagpahanumdom naman ang natungdan sa publiko nga magpa-check-up sang regular, maglikaw sa mga matam-is kag matambok nga pagkaon, kag ipabilin nga aktibo ang pagpangabuhi agud malikawan ang diabetes kag mga komplikasyon nga tuga sini.
Interviewed by Bombo Jessa Mae Siman De Los Santos
