ROXAS CITY – Panibag-o nga rekord sang pagtaas sa kaso sang dengue ang napagkit sang Department of Health (DOH) Capiz.
Ba-se sa pinakaulihi nga rekord sang DOH, PHO kag Capiz Epidemiological Surveillance and Response Unit (CESRU) nga nagdangat na karon sa 2mil 589 ang numero sang mga nabiktima sang balatian nga dengue sa probinsiya sang Capiz humalin Enero 1 tobtob sini nga bulan sang Hulyo, 2019.
Ginpahayag ni Mr. Joeffrey Pancho Espiritu, development management officer IV sang DOH-Capiz nga pinakamataas sa gihapon ang Roxas City nga may 518 na ka mga kaso sang dengue, ginsundan sang banwa sang Dao nga may 276, 235 sa Pontevedra, 220 sa Panay, 212 sa Tapaz, 181 sa President Roxas, 164 sa Ivisan, 111 sa Mambusao, 103 sa Panit-an, 95 sa Sigma, 94 sa Dumalag, 78 sa Jamindan, 73 sa Sapian, 66 sa Cuartero, 59 sa Maayon, 54 sa Dumarao kag 50 sa Pilar.
Bangud sa makaalarma na nga kaso sang dengue, magapatawag naman sang sinapol ang provincial crisis management committee agud ila estoryahan ang mga pamaagi para matapna na ang pagtaas sang numero sang amo nga sakit.
Posible man nga magdeklara sang dengue outbreak sa probinsiya ang gobernador
Apang suno kay Espiritu magdeklara ukon indi sang dengue outbreak ang gobyerno, magahimo sang tikang ang natungdan nga mga ahensiya agud matapna ang pagtaas sang kaso sang dengue.
Liwat man ini nagpahanumdum sa publiko nga sundon ang 4 o’clock habit kag 4S strategy subongman pasanyugon pa ang ABAKADA program sa kabaranggayan.
