ROXAS CITY – Tuman nga naalarma ang Department of Health (DOH) sa padayon nga pagtimbuok sang kaso sang balatian nga dengue sa probinsiya sang Capiz.
Sa interview sang Bombo Radyo kay Mr. Joeffry Espiritu, ang Development Management Officer IV kag tagpamaba sang DOH-Capiz, ginpahayag sini nga base sa pinaka-ulihi nga datos sang ahensiya, naglab-ot na sa 1, 136 ang napagkit nga kaso sang nasambit nga balatian sa probinsiya subong nga tuig.
Mas mataas ini sang 700 porsyento kun ikomparar sa napagkit nga kaso sa kapareho nga period sang nakaligad nga tuig nga may yara lamang sang 140 ka mga kaso.
Napagkit ang pikamataas nga kaso sa siyudad sang Roxas nga may 234; banwa sang Dao nga may 132; 120 sa Panay; 118 sa Pontevedra; 74 sa President Roxas; 76 sa Ivisan; 55 sa Tapaz; 51 sa Dumalag; tig-44 sa Jamindan kag Panit-an; 40 sa Cuartero; 35 sa Sigma; 34 sa Mambusao; 29 sa Sapian; tig-20 sa Dumarao kag Pilar, kag 10 naman sa Maayon.
Sa nasambit nga datos suno kay Espiritu, naglab-ot na sa pito ang napatay bangud sa nasambit nga balatian nga napagkit sa siyudad sang Roxas, banwa sang Dao, Pontevedra, Ivisan kag President Roxas.
Kadamuan sa mga nakaangkon sang nasambit nga balatian ang mga kabataan nga isa tubtob napulo ka tuig ang edad.
Bangud diri, ginapanugyanan sang ahensiya ang publiko nga pasangkaron pa ang preventive measures bilang kontra sa paglapta sang balatian nga dengue sa mga komunidad kalakip na diri ang ‘4S’ strategy nga ginalakipan sang Search and Destroy Mosquito Breeding Places; Secure Self-Protection; Seek Early Consultation; Support Fogging o Spraying sa mga hotspot areas.
