ROXAS CITY -Ginkaalarma karon sang Department of Health (DOH) Capiz ang pagtaas sang numero sang mga kaso sang dengue sa probinsiya.
Suno kay Mr. Joeffrey Espiritu, development management officer IV sang DOH-Capiz, ba-se sa rekord sang talatapan nga humalin Enero 1 tobtob Mayo 4, 2019, nagalab-ot na karon sa 864 ang kaso sang dengue, sa diin anum na ang napatay.
Gikan ang mga ini sa banwa sang Dao, Ivisan, President Roxas kag Pontevedra ang napatay na mga biktima sang dengue sini nga tuig 2019.
Samtang narekord ang pinakamataas nga kaso sang nasambit nga sakit sa Roxas City nga may 192, ginsundan sang banwa sang Mambusao kag banwa sang Dao nga may 97.
Liwat ginpahanumdum ni Espiritu ang publiko nga magpaninlo sang ila nga palibot para indi magdamo ang lamok.
Nag-apelar man ini sa tanan nga gilayon magpa-check up sa doktor kun makabatyag sang mga sintomas sang dengue kag indi na paghulaton nga maglala ini.
