ROXAS CITY – Ginkaalarma karon sang Department of Health (DOH)- Capiz ang padayon nga pagtaas sang kaso sang dengue sa probinsiya sang Capiz.
Sa exclusive interview sang Bombo Radyo Roxas kay Mr. Joeffrey Espiritu, Development Management Officer IV sang DOH-Capiz, ginpahayag sini nga nagdangat na karon sa 1,589 ang kaso sang dengue nga na-record sang talatapan ukon 777 porsyento nga nagtaas sumugod Enero 1 tobtob Hunyo 15, 2019.
Suno kay Espiritu nga mataas ang karon nga numero sang mga naapektuhan sang balatian kumpara sang nagligad nga tuig nga may yara lamang sang 121 ka mga kaso.
Ginakabig man ni Espiritu nga makalaarma ang padayon nga pagtaas sang kaso sang dengue sa diin kun indi ini gilayon matapna posible nga makaangkon sang outbreak sa amo nga balatian.
Pinakamadamo nga kaso nga na-rekord ang talatapan amo sa Roxas City nga may 394 ka mga kaso sang dengue, banwa sang Dao nga may 175, 164 sa Pontevedra, 160 sa Panay, 113 sa Tapaz, 110 sa President Roxas, 112 sa Ivisan, 64 sa Mambusao, 60 sa Dumalag, 57 sa Panit-an, 53 sa Jamindan, 46 sa Cuartero, 45 sa Sapian, 42 sa Sigma, 36 sa Pilar kag 32 sa Dumarao.
Sa nasambit nga numero suno kay Espiritu, may pito na ka mga nagkalamatay sa amo nga balatian.
Kadam-an sa mga nakaangkon sang amo nga balatian ang mga kabataan nga nagapang-edaron sang isa tobtob napulo ka tuig ang edad.
Bangud diri, liwat ginapahanumdum ni Espiritu sa publiko agud malikawan ang amo nga balatian, kinahanglan nga magpanglimpyo sa palibot kag sundon ang 4S strategy sang ahensiya kasubong sang Search and Destroy Mosquito Breeding Places; Secure Self-Protection; Seek Early Consultation; Support Fogging ukon Spraying sa mga hotspot areas.
