ROXAS CITY – Nagdangat sa 179 ang numero sang Dengue sa probinsya, nga narekord sumugod sang Enero 1 tubtob Hunyo 11, sini nga tuig.
Nagtaas ini sang 42 porsyento ikumparar sa 126 nga nabalhag sa kapareho nga binulan sang tuig 2021.
Suno kay Mark Louie Atanque, sang Capiz Provincial Health Office, may yara na sang clustering of cases sa pila ka munisipyo kag diri sa syudad, nagakahulugan nga may narekord nga kaso sa kada semana sa mga lugar sang Sapian, Bolo kag Mongpong sa Roxas City, Brgy. Pangabuan kag Pangabat sa Jamindan.
Pinakamadamo nga may kaso sang nasambit nga balatian amu ang syudad sang Roxas nga may 68, ginasundan sang Jamindan 40, Pontevedra 10, Sapian 9, Dao 8, Cuartero 6, Panay 5, Pilar, Ivisan, President Roxas kag Tapaz nga may tig-4, Mambusao kag Dumarao nga may tig-3, Sigma 2, Panit-an kag Dumalag nga may tig-1.
Apisar nga nagtaas ang kaso sang Dengue sa karon nga tuig, ginpahayag nga wala sa karon sang napatay sa amu nga balatian sa Capiz.
Pahanumdom sang tagdumalahan sang Capiz PHO nga ipabilin ang mamala kag malimpyo nga palibot, ilabi na sa karon nga tig-ululan nga uso ang nasambit nga balatian.
