ROXAS CITY – Nagdangat na sa masobra 2,000 nga kaso sang dengue ang napagkit sang Capiz Provincial Health Office sumugod Enero tubtob bulan sang Agusto subong nga tuig kung sa diin lima diri ang ginbawian sang kabuhi nga lunsay nagikan sa syudad sang Roxas.
Sa interview sang Bombo Radyo kay DOH Capiz Information Officer Joefry Espiritu, ginpahayag sini nga ang nasambit nga numero ang base sa pinaka-ulihi nga datos sang ahensya kung sa diin mas mataas ini sang 318.40% kung ikumparar sa 500 nga kaso sadtong tinalikdan nga tuig.
Suno kay Espiritu, bangud padayon ang pagtaas sang dengue sa probinsya padayon ang ila pag-monitor kag surveillance kaupod ang pila ka mga ahensya sang gobyerno agud mapunggan kag matapna ang makahalalit nga sakit.
Importante suno diri nga sundon ang Search and Destroy, Seek Early Consultation, Self-Protection Measures, kag Support fogging/spraying ukon 4S strategy agud malikawan ang pagdamo sang lamok nga nagadala sang sakit nga dengue.
