ROXAS CITY, CAPIZ – Naglab-ot na sa 378 ang kabug-usan nga kaso sang Hand, Foot, and Mouth Disease (HFMD) sa probinsya sang Capiz, base sa pinakaulihi nga datos halin sa Provincial Health Office (PHO).
Sa interview sang Bombo Radyo Roxas kay Dr. Donalyn S. Bonites, Medical Specialist sang Bailan District Hospital, iya ginpahayag nga naglab-ot sa 35 ang panibag-o nga kaso nga nabalhag sang nasambit nga balatian.
Dugang pa sang natungdan, base sa Morbidity Week 28 nga nagasakop halin Enero 1 tubtob Hulyo 12, 2025, ang nabalhag nga kaso subong nga tuig nagtaas sang 600% kun ikumpara sa kapareho nga period sang 2024, nga may 54 ka kaso.
Padayon naman ang pagpahamtang sang Provincial Health Office sang mga health advisory kag preventive measures agud malikawan ang paglapta sang Hand, Foot and Mouth Disease, ilabi na sa mga kabataan nga amo ang pinaka-apektado sa sini nga balatian.
