ROXAS CITY – Padayon nga ginamonitor sang Provincial Health Office (PHO) Capiz, ang kaso sang Leptospirosis kag Dengue sa probinsya.
Sa interview sang Bombo Radyo kay Mr. Joeffry Espiritu Management Officer IV sang Department of Health Capiz, ginpahayag sini nga ba-se sa ila datos naglab-ot na sa 38 ang kaso sang leptospirosis kung sa diin 5 diri ang ginbawian sang kabuhi samtang masobra 500 nga kaso sa Dengue kag 3 diri ang napatay.
Suno kay Espiritu ang nasambit nga mga kaso sang leptospirosis, ang nagikan sa banwa sang Dao nga may 2, Dumalag-3, Dumarao-1, Ivisan-2, Jamindan-1, Maayon-2, Panay-4, Panitan-1, Pilar-2, Pontevedra-5, President Roxas-2, Sapian-3, Sigma-1 kag ang syudad sang Roxas may yara sang 9 ka kaso.
Ang mga ginbawian naman sang kabuhi, ang nagikan sa banwa sang Pontevedra-1, President Roxas-1, Dumalag-1, kag sa banwa sang Panay nga may 2.
Ginpahayag man sini nga sa ila bag-o nga monitoring, wala sang bag-o nga kaso ang nabalhag nagikan sa nagkalain-lain nga mga kabanwahanan.
Ang nasambit nga numero sang leptospirosis ang mas mataas sang 80 porsyento ikumparar sadtong tinalikdan nga tuig, rason nga kinahanglan suno diri nga indi magkumpyansa ilabi na subong nga indi mapaktan ang lakat sang tyempo.
Tandaan nga ang Dengue, wala sang ginapili maulanon man ukon mainit ang panahon posible nga makaangkon sini kag tunaan sang kamatayon.
Paalinton ni Espiritu sa publiko, ipabilin ang katinlo sa palibot, mangin alerto, himuon ang 4’o’clock habit kada hapon sa lugar pinaagi sini agud matapna ang mga lamok.
Magluwas sa Dengue, ang leptospirosis isa man ka makamamatay nga sakit nga uso sa panahon sang tag-ululan.
Ini ang nagikan sa ihi kag higko sang ilaga.
Agud malikawan, indi maglusong ukon magpaligo sa baha ilabi na kun ikaw may pilas, siguraduhon man suno diri nga nakasuksok sang bota kag gloves, ukon limpyuhan gilayon ang lawas sabonan kag banlawan.
Pananglitan nga maka-eksperyensya sang mga sintomas, gilayon nga magpalantaw sa doctor.
