ROXAS CITY – Nagsaka sa 27 ang numero sang mga nag-angkon sang Leptospirosis sa bug-os nga Capiz, kun sa diin 5 diri ang nabalhag nga patay, sumugod sang Enero tubtob Abril 15, sini nga tuig.
Ini ang ginkumpirmar ni Mr, Joeffrey Espiritu, Development Management IV kag Information Officer sang Department of Health (DOH) Capiz, sang mainterview sang Bombo Radyo.
Suno kay Espiritu, nagsaka ini nga numero sang 225% ikumpara sa 8 nga narekord nga kaso sang Leptospirosis sa kapareho nga binulan, sang nagligad nga tuig.
Natukiban nga pila ka sa mga biktima ang mga mangunguma.
Pinakamadamo diri ang syudad sang Roxas-7; Dao-1; Dumalag-2; Ivisan-1; Maayon-1; Panay-3; Pilar-2; Pontevedra-5; President Roxas-2; Sapian-2 kag Sigma-1.
Ang sakit nga Leptospirosis ang mahimo makuha sa higko sang ilaga nga nagasulod sa lawas sang tawo.
Makabatyag sang lagnat, pagpalanakit sang kalawasan lakip ang pusugpusogan kag ulo kag nagapula ang mata sang tawo nga may leptospirosis.
Ginkasubo man ni Espiritu nga may lima ka mga napatay sa nasambit nga sakit sa probinsya.
Pahanumdom sini sa mga tawo nga ipabilin ang malimpyo nga palibot kag magsuksok sang proteksyon sa lawas ilabi na sa mga nagapadulong sa talamnan, kag gilayon nga magkadto sa Doktor sa tion nga makabatyag sang nasambit nga mga sintomas.
