CAPIZ- Nagtaas ang kaso sang balatian nga leptospirosis sa probinsya ang Capiz samtang nagapabilin nga manubo ang kaso sang balatian nga dengue.
Sa interview sang Bombo Radyo kay Mr. Jeoffrey Espiritu, Information Officer sang Department of Health Capiz, iya ginpahayag nga bangud sa masami nga naga-inulan kag mga pagbaha nagsaka ang amo nga kaso sang nasambit nga balatian.
Suno kay Espiritu, halin sang Enero 1 tubtob Nobyembre 15, 2025, may yara sang 75 tanan ka mga kaso ang nabalhag sa leptospirosis sa diin nga 12 ang ginbawian sang kabuhi bangud sini. Mas mataas ang nasambit nga numero subong nga tuig sang kapin 114% kun ipaanggid sang tinalikdan nga mga tinuig.
Samtang, pahayag niya, nagapabilin nga manubo ang kaso sang balatian nga dengue sa probinsya. Halin Enero 1 tubtob Nobyembre 15, may yara lang sang 1,517 kag anom ka kabuhi ang nadula bangud sini. Nagnubo ini sang 55% kun ipaanggid sa mga tinalikdan nga tuig.
Nagapanawagan naman ang natungdan sa publiko nga permi nga ipabilin nga malimpyo ang palibot kag kun mahimo indi mag-ubog sa tubig baha kun wala manlang sang kinahanglan gid agud makalikaw sa amo nga mga balatian.
Interviewed by Bombo Francis Biñas
