ROXAS CITY – Nagakabalaka ang World Health Organization (WHO) sa liwat nga pagtaas sang kaso sang tuberculosis sa bug-os nga kalibutan.
Ini ang una nga kahigayunan nga nagtaas liwat ang nasambit nga kaso matapos ang pila ka dekada.
Ginsiling ni WHO Chief Tedros Adhanom Ghebreyesus nga ginatudlo nga rason amu ang wala masyado natutukan ang sakit bangud sa COVID-19 pandemic.
Dugang pa sang WHO head nga nagakadapat nga maghimo na sang tikang ang kada pungsod agud mauntat ang paglala sang mga kaso.
Nagalab-ot na sa karon sa 4.1 milyon ka tawo ang may yara sang TB sa bilog nga kalibutan samtang yara sa 2.9 milyon ang wala sang opisyal nga diagnosis kag nadeklarar nga may yara sang TB sumugod pa sadtong 2019.
Nahibaluan nga nagapangduha ang TB sa deadliest infectious disease kadungan sang COVID-19 nga nagikan sa bacteria nga masami nagaapekto sa baga.
