ROXAS CITY-Ginpanginwala sang isa ka dietician nga may yara sang nagakahinabo nga kinawatay sang pagkaon kag panakot sa Dietary Section sang Roxas Memorial Provincial Hospital (RPMH).
Ini ang ginpanindugan ni Josephine Bernardo, in-charge sang Dietary Section sang nasambit nga ospital sang mainterview sang Bombo Radyo.
Aminado si Bernado nga madamo na ini sang nabatian nga mga alegasyon angut sa nagakahinabo nga kinawatay sang pagkaon kag mga panakut sa nasambit nga departamento apang ginpayahag sini nga wala man sang may napamatud-an nga nagahimo ini.
Ginkakibot man sini ang pagpatawag sa iya sang pamunuan sang RMPH bangud wala man ini sang may nadakpan nga nagahimo sang amo nga butang.
Gindugang pa ni Bernado nga nakahibalo ang mga empleyado sang dietary section nga bawal ang mangawat sang pagkaon kag panakot humalin pa sang nagligad nga administrasyon.
Samtang nagalain naman ang buot sini bangud ginapasibangdan ang mga staff sang dietary section sa pihak sang hugot sini nga pag monitor sang sulod sang nasambit nga departamento.
Handa man ang mga staff sang dietary section sa tion nga magpatigayon sang imbestigasyon ang pamunuan sang nasambit nga ospital.
