MANILA – Ginpasidunggan bilang Box Office Queen and King sanday Kathryn Bernardo kag Alden Richards sang Cinema Exhibitors Association of the Philippines (CEAP) anum ka bulan matapos ginpagwa sa mga sinehan ang pelikula nga “Hello, Love, Again.”
Ginpaambit sang ila mga ahensya ang balita sa isa ka post sa Instagram sang Mayo 6, sa diin makita nga nagabaton si Alden sang tropeo samtang wala si Kathryn sa amo nga kahiwatan.
Magluwas sa pagkilala sa mga bida, gindayaw man sang Cinema Exhibitors Association of the Philippines ukon (CEAP) ang pelikula bangud sa tumalagsahon nga box office revenue sini nga naglab-ot sa P1.6 billion, nga ginakilala man bilang pinakamataas nga kita sang Filipino film sa maragtas sang pungsod.
Ang pelikula isa ka sequel sang 2019’s Hello, Love, Goodbye, nga liwat nga nagasunod sa istorya sang paghigugma nanday Joy kag Ethan.
