ROXAS CITY – Ginpaandam sang Bangko Sentral ng Pilipinas sa Regional office sang rehiyon 6 nga kun mahimo kilatison sang maayo ang kuwarta nga ginabayad ukon ginasinsilyo antes ini batunon.
Sa interview sang Bombo Radyo kay Dr. Gregorio Baccay, Acting Bank Officer V, kag Ms. Karenz Odchigue, Bank Officer II sang BSP Region 6 nga nakaba-se sa syudad sang Cebu, ginpahayag nga apisar indi maka-alarma ang insidente kinahanglan sa gihapon maghalong bangud posible magdamo ang ini nga modus.
Suno kay Odchigue, agud mahibaluan kun indi peke ang ang kuwarta, tandaan ang “Feel, Look, and Tilt”.
Una, hikapon ang kuwarta kag dapat magaras ini, ikaduha, lantawon ang serial number sa ibabaw sang natuo nga bahin kag sa idalom sang nawala nga bahin kun ini pareho, tsekyaron man ang kuwarta kun may yara sang security thread kag sa natuo nga bahin sa may puti nga porsyon, pasilawan ini kag dapat makita ang landong sang mga tawo nga nakafeature sa mismo nga paper bill, ikatatlo, patakilidon ang kuwarta kag lantawon kun nagalain-lain ang duag sang optically variable patch ukon sticker.
Apang, suno diri indi insakto nga kumuson ang paper bill bangud indi ini makapamatuod kun matuod ukon peke ang kuwarta kag may violation ini sa idalum sang PD 247 nga ginabawal ang pagsamad sa kwarta nga papel kag mahimo mapreso ukon magbayad sa mas o menus 20,000 kun sin-o man ang maglapas sini.
Dugang pa sang duwa, mas maayo nga itugyan sa pinakamalapit nga BSP kun may duda nga peke ang nabaton nga kuwarta bangud sila lang ang makatsekyar pinaagi sa apat ka lebel nga ginagamit nila.
Panugyan sang BSP, maghalong apisar nga gamay lang ang kaso sang nasambit nga modus, kilatison maayo ilabi na ang paper bill nga may dako nga kantidad kun nagabakal sa merkado.
