Dismayado ang isa ka mister pag-abot sa seguridad sa parking space area sang Roxas Memorial Provincial Hospital matapos makaduha ka beses nga nakawatan ang iya motorsiklo nga naka-park sa parkingan sang nasambit nga ospital.
Sa exclusive interview sang Bombo Radyo kay alyas Toto, yara sa legal nga pang-edaron kag residente sang isa ka Barangay sa syudad sang Roxas, nagapadulong ini kada hapon sa ospital agud magbantay sa iya iloy nga anom na ka adlaw nga naka-admit kag aga na ini nagapauli.
Apang tuman ang iya pagkadismaya bangud sang gin-report sini sa security guard ang natabo nga pagpangawat sa pila ka parts sang iya motorsiklo, ginsabat lamang ini sang sekyu nga ‘normal lang ang kinawatay sa parking space area’ sang amu nga ospital.
Pila sa mga nakawat sa motorsiklo ni alyas Toto amu ang side mirror, busina, led light kag cp holder. Dugang pa sini nga indi lamang siya ang nabiktima bangud may kadungan ini nga nag-report sa security nga nadulaan sang helmet kag gasolina.
Nahibaluan nga samad man suno diri ang Closed Circuit Television (CCTV) sa lugar.
Panawagan sini sa pamunuan sang RMPH nga kun tani aksyonan ang kinawatay sa amu nga parking space kag ginahaylo man sini ang iban nga nabiktima nga mag-report agud mahatagan sang aksyon.
